Te kupu whakataki a te Tumuaki
Te Reo | English
I ngā wā o te raru, kei konā a Te Manatū Whakahiato Ora (MSD) ki te āwhina i ngā tāngata o Aotearoa, otirā he wā anō ka hiahia āwhina te nuinga o tātou.
Ko tā Te Manatū he whakahaere, he whakarato hoki i te pūnaha tokoora o Aotearoa. Ka toro ā mātou mahi ki te tuku mahi, te whakangungu, te tautoko moni whiwhi, ngā take hauātanga, te tautoko i ngā kaumātua me ngā ākonga, te tautoko i ngā kaiwhakarato -hapori, te tautoko i te tauāraitanga whakarekereke ā-whānau, taitōkai me ngā ratonga tautoko, te tautoko ohotata, te tūhonohono ā-pāpori, te tautoko noho whare, me te whakatau i ngā kerēme tūkino o mua. Ahakoa he aha te mahi, ko wai hoki ō mātou hoa mahi, he kaupapa matua tō mātou e whakakotahi ana i ngā wāhanga katoa o tō mātou whakahaere:
Manaaki Tangata, Manaaki Whānau - Ka āwhina mātou i te hunga o Aotearoa kia haumaru, kia pakari, ā, kia tū motuhake.
I roto i tēnei Tauākī Koronga, ka tōai mātou i tō mātou manawanui ki a Te Pae Tawhiti, tō mātou anga rautaki. Mā te whakapiki i runga i ngā mahi kua oti kē, e whai ana mātou i tētahi hōtaka awhero nui o te whakaumu e kitea ai ngā panoni nui ki ā mātou pūnaha me ngā tukanga papanga. Ko te tikanga o tēnei ka tino ea te hoahoa me te whakarato anamata o ngā ratonga e hiahia ana ā mātou kiritaki me ngā hapori.
Engari kaua te whakaratonga o te rā nei e noho hei papa mō te aronga ki te whakaumu i te anamata. Ka whakauru hohe tonu mātou ki ngā mahi ka whakapiki i te oranga o ngā tāngata o Aotearoa. Ka uru ki tēnei te tautoko i ngā tāngata ki te whakariterite, te rapu me te pupuri i ngā tūranga mahi, te tautoko tonu i ngā rohe hei urupare ki te KOWHEORI-19, te whakapiki i te tūhonotanga ā-pāpori, te ārai i te whakarekereke ā-whānau me te taitōkai, me te whakarite i te whakatapokotanga me te whai wāhitanga o ngā tāngata katoa o Aotearoa.
Ka tiro te Tauākī Koronga ki tua o te KOWHEORI-19, ki te tautoko hoki ka hiahia ngā tāngata o Aotearoa i ngā tau e tū mai nei. Ahakoa te nui, kua whakaritea e mātou e kore tō mātou urupare KOWHEORI-19 e whakapōrearea i ngā mahi waiwai i ētahi atu wāhanga. Ka koke tonu i a mātou ngā whakaarotau i tuhia e tō mātou Minita i tāna whakataki.
E tutuki ai tēnei, me raungāwari mātou ki te whakatutuki i ngā matea panoni o ngā tāngata o Aotearoa. Ko te hunga e haere mai ana ki a mātou kia āwhinatia rātou i tēnei rā, he rerekē ki te hunga i kuhu mai ki te wāhi ratonga i ngā 20 tau kua hipa - he tuatini ake ngā matea a ētahi, otirā ko ētahi atu ka hiahia āwhina wā poto, ā, he iti noa pea te pāhekohekotanga ki a mātou. Me urutau hoki te ratonga e tukua ana e mātou, otirā me whakapakari mō te anamata, mō ngā panoni a ngā tau e tū mai nei.
Ka whakapakari tonu mātou i ā mātou mahi me ētahi atu, tae atu ki te whakakaha i te reo ā-rohe, ā-hapori hoki, i te mea kei te hunga kei te mura o te ahi ngā rapanga pai rawa.
Tauākī a te Tumuaki
I taku hainatanga iho i tēnei kōrero, e mea ana au kei te haepapa au ki ngā pārongo o ngā takune rautaki mō Te Manatū Whakahiato Ora. Kua whakaritea mai ēnei pārongo e ai ki ngā wāhanga 38 me te wāhanga 40 o te Ture Pūtea Tūmatanui 1989.
Debbie Power, Tumuaki
Te Manatū Whakahiato Ora
Hepetema 2022
Keep reading:
Next page: Chief Executive’s Introduction
Previous page: Minister’s foreword
